*MAKAMU WA RAIS AFUNGUA MKUTANO WA SHIRIKA LA KIINJILI LA KIMISHENI DUNIANI*



_*ASISISTIZA UMUHIMU WA KANISA NA SERIKALI KUENDELEA KUSHIRIKIANA KATIKA KUWAHUDUMIA WANANCHI*

Makamu wa Rais wa Jamhuri ya Muungano wa Tanzania Mhe. Dkt. Philip Mpango ametoa wito kwa viongozi wa mashirika yote ya kidini kuendelea kufanya kazi pamoja na kuimarisha ushirikiano na Serikali ili kuweza kuwatumikia vema wananchi.

Makamu wa Rais ametoa wito huo wakati alipomwakilisha Rais wa Jamhuri ya Muungano wa Tanzania Mhe. Dkt. Samia Suluhu Hassan katika ufunguzi wa Mkutano Mkuu wa Shirika la Kiinjilisti la Kimisheni Duniani (UEM) uliofanyika katika Kanisa la Kiinjili la Kilutheri Tanzania (KKKT), Usharika wa Mbezi Beach Jijini Dar es Salaam. Amesema ni vema Serikali na mashirika ya kidini kushirikiana zaidi katika kukabiliana na theolojia potofu, kukabiliana na umasikini, uharibifu wa mazingira pamoja na changamoto zinazojitokeza baina ya dini.

Pia Makamu wa Rais amesema Serikali ya Tanzania, itaendelea kusimamia haki ya kuabudu na ya kiroho kwa watu wote na kuhakikisha kwamba wananchi wanaendelea kufurahia amani na utulivu.

Makamu wa Rais ametoa rai kwa washiriki wa mkutano huo kujadili changamoto mbalimbali zinazoikumba Dunia kama vile hitaji la kulinda, kuhifadhi bioanuwai na kutumia mazingira kwa njia endelevu si kwa manufaa ya wachache tu bali kwa manufaa ya wanadamu wote, mimea na Wanyama. Amesema ripoti za kisayansi zinaonyesha kuwa maisha ya mwanadamu yatapungua ifikapo mwaka 2030 ikiwa uharibifu mkubwa wa rasilimali za Dunia na athari za mabadiliko ya tabianchi na uchafuzi wa mazingira hazitadhibitiwa, kama jambo la dharura.

Vilevile, Makamu wa Rais amewasihi washiriki wa Mkutano huo na Kanisa kwa ujumla kufanya uwekezaji makini katika miradi muhimu ya utoaji huduma za kijamii ili kuongeza manufaa ya uwekezaji huo na kupunguza utegemezi kwa wafadhili.

Halikadhalika, Makamu wa Rais amelipongeza Kanisa la kiinjili la Kilutheri Tanzania kwa kwa kazi kubwa linayofanya katika kusaidia watu wenye mahitaji maalumu wakiwemo wenye ulemavu. Amesema matokeo ya kazi hiyo yamepelekea kuboresha maisha kwa watoto wenye ulemavu na watu binafsi wenye ulemavu wa afya ya akili, na hivyo kukuza ushirikishwaji zaidi wa kundi hilo. Amelihimiza Kanisa kuongeza zaidi utoaji huduma kwa watu wenye mahitaji maalum kwa kuwa bado jamii inahitaji huduma hizo.

Mkutano huo unachagizwa na Kauli mbiu isemayo "Boriti Katika Jicho Letu: Ubaguzi Kanisani na Udiakonia" una lengo la kutathmini maisha ya wanadamu, kuthamini utu wa binadamu na kuondoa mitazamo ya kibaguzi pamoja na vizuizi vya kimfumo kwa makundi mbalimbali. Mkutano huo unashirikisha wajumbe kutoka Bara la Ulaya, Afrika pamoja na Asia.

 

Imetolewa na

Ofisi ya Makamu wa Rais

14 Septemba 2025

Dar es Salaam.



 




Comments

Post a Comment

Popular posts from this blog

HATMA YA TAIFA IPO KATIKA USAWA WA KIJINSIA, SIO VIWANDA PEKEE.

Image
Na,Agnes Mambo Tanga,  Mkuu wa Mkoa wa Tanga, Balozi Dk Batilda Burian amesema maendeleo ya taifa hayawezi kupimwa kwa kiwango cha uwekezaji au ujenzi wa viwanda pekee, bali kwa namna serikali na jamii zinavyoweka fursa za usawa wa kijinsia katika ajira, hususan kwa watoto wa kike na wa kiume. Dk Burian ameyasema hayo alipokuwa akifungua maadhimisho ya nne ya Siku ya Kimataifa ya Wanawake katika Sekta ya Bahari yaliyofanyika jijini Tanga jana (Jumapili) Mei 18/2025. Akimnukuu mwanafalsafa maarufu Plato, aliyewahi kusema kuwa "Kilimo cha jamii yoyote ni jinsi inavyowathamini wanawake", Dk Burian alisisitiza kuwa taifa linapaswa kujipangia malengo ya kuhakikisha usawa wa kijinsia unatekelezwa kikamilifu. "Tusiache mwanamke abaki ufukweni bali tunataka aingie ndani ya bahari," alisema kwa msisitizo.. Alieleza kuwa licha ya juhudi zinazofanywa na serikali na wadau mbalimbali, sekta ya bahari bado inatawaliwa na wanaume, huku takwimu zikionyesha kuwa wanawake wanaofanya ...
Read more

MSAKO MKALI KUREJESHA HALI ya USALAMA TANGA, WATUHUMIWA 42 WAKAMATWA

Image
 Na,Agnes Mambo,Tanga. Jeshi la Polisi Mkoani Tanga limewakamata watuhumiwa 42 wanaohusishwa na matukio mbalimbali ya uporaji, umiliki wa dawa za kulevya, pamoja na pikipiki zisizosajiliwa na mafuta yanayodhaniwa kuwa ya magendo. Operesheni hiyo iliyoanza Juni 15, ni juhudi mpya za vyombo vya dola kusafisha jiji dhidi ya ongezeko la vitendo vya kihalifu. Akizungumza na waandishi wa habari ofisini kwake Jumanne, Kamanda wa Polisi Mkoa wa Tanga, Kamishna Msaidizi wa Polisi (ACP) Almachius Muchunguzi, alisema watuhumiwa hao walikamatwa katika operesheni maalum inayoendelea inayolenga maeneo yenye viashiria vya uhalifu jijini. Miongoni mwa waliokamatwa ni watu watano wanaoshukiwa kumvamia na kumpora kwa nguvu Katwibu Siraji, mwalimu wa Shule ya Sekondari Postal. Watuhumiwa hao wanadaiwa kumpiga na kuiba simu ya mkononi ya mwalimu huyo, tukio lililozua taharuki miongoni mwa wananchi na kuongeza shinikizo kwa polisi kuchukua hatua. Kamanda Muchunguzi alikiri kuwepo kwa ongezeko la visa v...
Read more

PJT-MMMAM YAWEZESHA UANZISHWAJI WA VITUO 206 VYA MALEZI YA WATOTO WADOGO

Image
OR-TAMISEMI Serikali kupitia Programu Jumuishi ya Taifa ya Malezi, Makuzi na Maendeleo ya Awali ya Mtoto (PJT-MMMAM) imefanikiwa kuanzisha vituo 206 vya kijamii vya kulelea watoto wadogo mchana na kusajili vituo binafsi 4,178 nchi nzima tangu mwaka 2021. Akizungumza kwa niaba ya Waziri wa Nchi, Ofisi ya Rais – TAMISEMI, Mhe. Mohamed Mchengerwa, Mkuu wa Mkoa wa Mwanza, Mhe. Said Mtanda, amesema vituo hivyo vinahudumia jumla ya watoto 11,675 huku vya binafsi vikihudumia watoto 6,154. Aidha, jumla ya walezi 445 wamepatiwa mafunzo ya malezi na makuzi ili kuhakikisha utoaji bora wa huduma katika vituo hivyo. Mtanda alisisitiza kuwa uwekezaji katika malezi ya awali ni msingi wa kukuza rasilimali watu yenye tija kwa familia na taifa kwa ujumla. Kwa upande wake, Mwakilishi wa Naibu Katibu Mkuu Wizara ya Maendeleo ya Jamii, Bw. Sebastian Kitiku, amesema mkutano wa tathmini wa siku mbili unawaleta pamoja Maafisa Lishe kutoka Tanzania Bara na Zanzibar pamoja na wadau wa maendeleo ili kujadili maf...
Read more